హైద‌రాబాద్‌ : తెలంగాణ‌లో ఇప్పటికే 5 కోట్ల వ్యాక్సినేషన్ డోసులు ఇచ్చామని, అర్హులైన అందరికీ అతి త్వరగా వ్యాక్సిన్స్ ఇస్తామని మంత్రి హ‌రీశ్ రావు తెలిపారు. సీఎం కేసీఆర్‌ అధ్యక్షతన కేబినెట్ సమావేశం కొన‌సాగుతోంది. మొదటగా కరోనా పరిస్థితిపై చర్చ జరిగింది. వైద్య, ఆరోగ్యశాఖ మంత్రి.. కరోనా పరిస్థితిని గణాంకాలతో వివ‌రించారు. రాష్ట్రంలో కరోనా అదుపులో ఉన్నదని ఎలాంటి పరిస్థితులనైనా ఎదుర్కొనేందుకు సంసిద్ధంగా ఉన్నామని తెలిపారు. ప్రజలు గుంపులుగా గుమిగూడకుండా పూర్తి స్వీయ నియంత్రణ పాటించడం ద్వారా కరోనాను కట్టడి చేయవచ్చని తెలిపారు. 
      మున్సిపల్ శాఖ, పంచాయతీరాజ్ శాఖలతో సమన్వయం చేసుకుంటూ వ్యాక్సినేషన్ కార్యక్రమాన్ని త్వరగా పూర్తి చేయాలని వైద్యారోగ్యశాఖ మంత్రిని, సంబంధిత అధికారులను ముఖ్యమంత్రి కేసీఆర్ ఈ సంద‌ర్భంగా ఆదేశించారు. ఇందుకోసం అన్ని జిల్లాల మంత్రులు కలెక్టర్లు సమీక్షా సమావేశాలు నిర్వహించుకోవాలని సూచించారు.