ప్రపంచంలోని పెట్టుబడులలో ఎక్కువ శాతాన్ని దేశంలోకి ఆకర్షిస్తామని, తద్వారా 2025 నాటికి ఐదు లక్షల డాలర్ల ఆర్థికాభివృద్ధిని సాధిస్తామని, దేశాన్ని ప్రపంచంలో అగ్రస్థానానికి తీసుకెళతామని, లక్షలాది మందికి ఉద్యోగాలు వస్తాయని (సంవత్సరానికి రెండు కోట్ల ఉద్యోగాలు ఇస్తామనే మాటను ఎప్పుడో చాపకిందికి నెట్టేశారు) మోడీ ప్రభుత్వం గొప్పగా ప్రచారం చేస్తున్నది. ప్రభుత్వరంగం అవసరం లేదని, ప్రయివేటు రంగంతోనే దేశాభివృద్ధిని సాధిస్తామని చెబుతున్నారు. అందుకోసం ప్రభుత్వ రంగ సంస్థలను అమ్మివేయటం, జాతీయ ద్రవ్యీకరణ పథకం ద్వారా లీజుకివ్వటం తదితర విధానాల ద్వారా ఆర్థికవ్యవస్థ మొత్తాన్ని బహుళజాతి, కార్పొరేట్‌ సంస్థల చేతులలో పెడుతున్నారు. తమ యజమానులైన ద్రవ్య పెట్టుబడిదారుల ప్రయోజనాలను నెరవేర్చటం, హిందూత్వ విధానాలను ముందుకు తీసుకుపోవటమే లక్ష్యంగా ఈ విధానాలను అమలు జరుపుతున్నారు.
బహుళజాతి కంపెనీల్లో భారీ తొలగింపులు
కేవలం లాభాలను పెంచుకోవాలనే లక్ష్యంతో కొన్ని బడాసంస్థలు ఏ విధంగా ఉద్యోగులను తొలగిస్తున్నాయో చూద్దాం. బడా సంస్థలలో ఒకటైన అమెజాన్‌ 18,000మంది ఉద్యోగులను తొలగిస్తున్నట్లు ప్రకటించింది. ఇది మొత్తం ఉద్యోగులలో 6శాతం. సాఫ్ట్‌వేర్‌ సంస్థ సేల్స్‌ఫోర్స్‌ 8,000 (10శాతం) మందిని తొలగించింది. గూగుల్‌ మాతృసంస్థ ఆల్ఫాబెట్‌ 1.86లక్షల మంది ఉద్యోగులలో 5.35శాతం మందిని తొలగించింది. ట్విట్టర్‌ 50శాతం మందిని తొలగించింది. తన ఆస్తిలో 90శాతం దానం చేసినట్లు గొప్పగా ప్రచారం చేసుకున్న మార్క్‌ జుకర్‌బర్గ్‌ పోటీ పెరిగి ఆదాయం తగ్గిందనే పేరుతో మెటా (ఫేస్‌బుక్‌) నుండి 11,000మంది (13శాతం) ఉద్యోగులను లే ఆఫ్‌ చేశాడు. ట్విట్టర్‌ను కొనుగోలు చేసిన ఎలన్‌ మస్క్‌ ఆ సంస్థలోని 3,700మందిని (మొత్తం ఉద్యోగులలో 50శాతం), భారతదేశంలో పనిచేస్తున్న ఉద్యోగులలో 90శాతం మందిని లే ఆఫ్‌ చేశాడు. ప్రపంచంలో పెద్ద సాఫ్ట్‌వేర్‌ కంపెనీలలో ఒకటైన మైక్రోసాఫ్ట్‌ 3000మంది ఉద్యోగులను తొలగించింది. ఖర్చులను తగ్గించుకోవాలన్న పేరుతో అమెరికన్‌ కంపెనీ హెచ్‌పి 2025 నాటికి 6,000 మందిని (మొత్తం ఉద్యోగులలో 10శాతం) తొలగించటానికి పథకం రూపొందించింది. అదే పేరుతో జొమాటో 2022లో 600మందికి పైగా ఉద్యోగులను తొలగించింది. బెటర్‌ డాట్‌కాం సంస్థ 2021 డిసెంబరు నుండి 4,100 మందిని తొలగించింది. ప్రపంచంలో అతి పురాతనమైన కార్ల తయారీ సంస్థ ఫోర్డ్‌ 3,800 మందిని లే ఆఫ్‌ చేసింది. ఇదే దారిలో... రిటైల్‌ దిగ్గజం వాల్‌మార్ట్‌, రాబిన్‌హుడ్‌, నెట్‌ఫ్లిక్స్‌, యూనిలివర్‌, టెస్లా... వంటి అనేక సంస్థలు లే ఆఫ్‌ చేశాయి. దేశంలో విద్యారంగంలోని అతి పెద్ద కంపెనీ అయిన బైజూస్‌ 2500 మంది ఉద్యోగులకు లే ఆఫ్‌ ఇచ్చింది. ఈ సంస్థలన్నీ శత కోటీశ్వరుల చేతులలోనే ఉన్నాయి. లాభాలు సంపాదిస్తున్నాయి. అయినప్పటికీ కేవలం లాభాలను మరింతగా పెంచుకోవటం కోసమే ఉద్యోగులను తొలగిస్తున్నాయి.
ఉన్నవారినే తొలగిస్తుంటే కొత్త ఉద్యోగాలు ఎలా?
దేశంలోని ప్రభుత్వరంగ సంస్థలన్నింటిని ప్రయివేటీకరిస్తామని మోడీ ప్రకటించారు. ప్రయివేటు సంస్థలు ఉద్యోగులను ఏ విధంగా తొలగిస్తున్నాయో పైన చూశాం. ప్రయివేటీకరణ వలన దేశంలోకి పెట్టుబడులు వస్తాయని, తద్వారా నిరుద్యోగులకు ఉద్యోగాలు వస్తాయని చెబుతున్నారు. కాని బడా పెట్టుబడిదారులు దేశంలో ఏర్పాటు చేస్తున్న కొత్త పరిశ్రమలను వేళ్ళపై లెక్కపెట్టవచ్చు. విదేశీ పెట్టుబడిదారులు దేశంలో ఒక పరిశ్రమను ఏర్పాటు చేస్తున్నారంటే మా రాష్ట్రంలో పెట్టండి అంటే మా రాష్ట్రంలో పెట్టండి అని రాష్ట్రాల ముఖ్యమంత్రులు వెంట పడటం చూస్తున్నాం. ప్రయివేటీకరణ వలన పెట్టుబడులు వస్తాయనటం ఎంత బూటకమో ఇది స్పష్టం చేస్తున్నది. అయినా దేశంలోకి పెట్టుబడులు రావటం వలన కొత్త పరిశ్రమల ఏర్పాటు, కొత్త ఉద్యోగావకాశాల సంగతి కాసేపు పక్కనబెడ్డాం. కాని ఉన్న పరిశ్రమలు ప్రభుత్వం నుండి ప్రయివేటు వారి చేతుల్లోకి పోతే కొత్త ఉద్యోగాలెలా వస్తాయి? ప్రయివేటు సంస్థలు ఉన్న ఉద్యోగులనే తొలగిస్తుంటే కొత్తవారికి ఉద్యోగాలెలా ఇస్తాయి?
నిరుద్యోగులకు ఉద్యోగాలు రావాలంటే ప్రభుత్వ రంగంలో పరిశ్రమలు ఏర్పాటు చేయాలి. ప్రభుత్వ-ప్రయివేటు సంస్థల మధ్య వ్యత్యాసం ఏమిటనేది ఇప్పుడు స్పష్టంగా కనిపిస్తున్నది. సంక్షోభం పేరుతో ప్రైవేటు సంస్థలు ఉద్యోగులను తొలగిస్తున్నా ఒక్క ప్రభుత్వరంగ సంస్థ కూడా ఉద్యోగులను తొలగించలేదు. కారణం ప్రభుత్వరంగ సంస్థలు కేవలం లాభాల కోసం మాత్రమే కాక, సామాజిక బాధ్యతతో పనిచేస్తున్నాయి. అందువలన ప్రయివేటు సంస్థల వలె కార్మికులు, ఉద్యోగులను తొలగించటం లేదు. ఉద్యోగులను తొలగించక పోయినప్పటికీ ఆ సంస్థలు నష్టాలపాలు కావటం లేదు. కేవలం లాభాలు తగ్గటం మాత్రమే జరుగుతుంది. ప్రయివేటు సంస్థలకు ఏ సామాజిక బాధ్యత లేదు కాబట్టే లాభాలు వస్తున్నప్పటికీ ఇష్టం వచ్చినట్లు ఉద్యోగులు, కార్మికులను తొలగిస్తున్నాయి.
కార్పొరేట్‌ సంస్థలతో అభివృద్ధి, ఉద్యోగ కల్పన జరగదు. బహుళజాతి, కార్పొరేట్‌ సంస్థలకు మన దేశాభివృద్ధి పట్టదు. వారికి లాభాలే ప్రధానం. లాభాలు వస్తాయనుకుంటే అభివృద్ధిని అడ్డుకోవటానికి, దేశాభివృద్ధిని దెబ్బ తీయటానికి కూడా వారేమాత్రం వెనుకాడరు. ఉద్యోగాల కల్పన సంగతి అటుంచి తమకు లాభాలు వస్తున్నప్పటికీ వాటిని ఇంకా పెంచుకోవటం కోసం ఉన్న ఉద్యోగులను కూడా తొలగిస్తారు. అటువంటి వారిని నమ్ముకొని దేశాన్ని అభివృద్ధి చేస్తామని, ఉద్యోగాలను కల్పిస్తామని చెప్పటం అంటే కుక్క తోక పట్టుకొని గోదావరి ఈదినట్టే.
దేశంలో అభివృద్ధి జరగాలన్నా, నిరుద్యోగం తగ్గాలన్నా పెద్దసంఖ్యలో చిన్న, మధ్య తరహా పరిశ్రమలు ఏర్పడాలి. వాటికి ముడి సరుకులు, మార్కెట్‌, రుణాలు తదితరాలలో ప్రభుత్వం సహకారం అందించాలి. బడా సంస్థల నుండి ఎదురయ్యే పోటీ నుండి రక్షణ కల్పించాలి. చిన్న, మధ్య తరహా పరిశ్రమలు ఎంత ఎక్కువగా ఏర్పాటైతే అంత ఎక్కువ మందికి ఉద్యోగాలు లభిస్తాయి. దేశాభివృద్ధి జరుగుతుంది. అంతే తప్ప ప్రభుత్వరంగ సంస్థల ప్రయివేటీకరణ, విదేశీ పెట్టుబడులపై ఆశలు పెంచుకొన్నంత కాలం నిరుద్యోగం తగ్గదు. దేశాభివృద్ధి జరగదు.
- ఎ. కోటిరెడ్డి