- సెమీస్‌లో సైటెక్‌తో ఢి
-బార్టీతో తలపడనున్న కీస్‌
- నేడు మహిళల సింగిల్స్‌ సెమీఫైనల్స్‌
- సిట్సిపాస్‌, మెద్వదెవ్‌ కూడా..
మెల్‌బోర్న్‌: ఆస్ట్రేలియన్‌ ఓపెన్‌ గ్రాండ్‌స్లామ్‌ మహిళల సింగిల్స్‌ సెమీఫైనల్లోకి 27వ సీడ్‌ కొలిన్‌(అమెరికా), 7వ సీడ్‌ ఇగా సైటెక్‌(పోలండ్‌) ప్రవేశించారు. బుధవారం జరిగిన క్వార్టర్‌ఫైనల్లో సైటెక్‌ 4-6, 7-6(7-2), 6-3తేడాతో కియా కనేపి(ఈస్టోనియా)ను ఓడించింది. కనేపి ప్రి క్వార్టర్స్‌లో 2వ సీడ్‌ సబలెంకాను చిత్తుచేసి క్వార్టర్‌ఫైనల్లోకి దూసుకొచ్చిన సంగతి తెలిసిందే. కోలిన్స్‌ 7-5, 6-1తేడాతో అన్‌సీడెడ్‌ కార్నెట్‌(ఫ్రాన్స్‌)ను వరుససెట్లలో ఓడించింది.
పురుషుల సింగిల్స్‌ సెమీఫైనల్లోకి 4వ సీడ్‌, గ్రీక్‌కు చెందిన సిట్సిపాస్‌, 2వ సీడ్‌, రష్యాకు చెందిన మెద్వదెవ్‌ ప్రవేశించారు. బుధవారం జరిగిన క్వార్టర్‌ఫైనల్లో సిట్సిపాస్‌ 6-3, 6-4, 6-2తేడాతో 11వ సీడ్‌ సిన్నర్‌(ఇటలీ)ని వరుససెట్లలో చిత్తుచేశాడు. మరో ఉత్కంఠ పోరులో మెద్వదెవ్‌ 6-7(4-7), 3-6, 7-6(7-2), 7-5, 6-4తేడాతో 9వ సీడ్‌ అగర్‌(కెనడా)పై పోరాడి గెలిచాడు. తొలి రెండు సెట్లను కోల్పోయిన మెద్వదెవ్‌ ఆ తర్వాత వరుసగా మూడు సెట్లను గెలుపొందడం విశేషం. శుక్రవారం జరిగే సెమీస్‌లో నాదల్‌తో బెర్రెట్టిని, మెద్వదెవ్‌తో సిట్సిపాస్‌ తలపడనున్నారు.
