- బంగారు, రజత, కాంస్య పతకాలు సొంతం
హైదరాబాద్ : జాతీయ ఫెన్సింగ్‌ చాంపియన్‌షిప్స్‌లో తెలంగాణ ఫెన్సర్లు సత్తా చాటారు. నేషనల్‌ టోర్నీలో తెలంగాణ రాష్ట్రం తొలిసారి పసిడి, సిల్వర్‌, కాంస్య పతకాలు కైవసం చేసుకుంది. కటక్‌లో జరిగిన జాతీయ ఫెన్సింగ్‌ చాంపియన్‌షిప్స్‌లో తెలంగాణ రాష్ట్రానికి ఓవరాల్‌ రన్నరప్‌ అవార్డు సైతం దక్కింది. ఈపీ బార్సు జట్టు విభాగంలో వి. లోకేశ్‌, వై. మురళీ, బి. శశాంక్‌లు బంగారు పతకం కొల్లగొట్టారు. సబ్రి బాలికల జట్టు విభాగంలో ఎం.బేబీ రెడ్డి, కె. గౌరి, ఏ. శిరీష, బి. సమీక్షలులు సిల్వర్‌ మెడల్‌ సొంతం చేసుకున్నారు. ఫాయిల్‌ బార్సు జట్టు విభాగంలో సిహెచ్‌.మణికంఠ, ఎల్‌.తనిష్క్‌ జాదవ్‌, ఎస్కే ఎలియాసొద్దిన్‌, ఎం. నిఖిలేశ్‌లు కాంస్య పతకాలు సాధించారు. జాతీయ టోర్నీలో సత్తా చాటి పతకాల పంట పండించిన యువ ఫెన్సర్లను తెలంగాణ రాష్ట్ర ఫెన్సింగ్‌ సంఘం అధ్యక్షుడు మర్రి రాజశేఖర్‌ రెడ్డి, కోశాధికారి ఎల్‌. సందీప్‌ కుమార్‌ జాదవ్‌లు అభినందించారు.
