- యుఎస్‌ఏపై 3-1తో ఘన విజయం
దోహా (ఖతార్‌) : 2022 ఫిఫా ప్రపంచకప్‌ తొలి క్వార్టర్‌ఫైనల్‌ బెర్త్‌ నెదర్లాండ్స్‌ సొంతం చేసుకుంది. శనివారం జరిగిన తొలి ప్రీ క్వార్టర్‌ఫైనల్‌ మ్యాచ్‌లో అమెరికాపై 3-1తో నెదర్లాండ్స్‌ ఘన విజయం సాధించింది. ప్రపంచకప్‌లో నాన్‌ యూరోప్‌ జట్ల చేతిలో (బ్రెజిల్‌ మినహా) ఓటమెరుగని నెదర్లాండ్స్‌ అదే ట్రెండ్‌ కొనసాగించింది. పదో నిమిషంలోనే మెంఫిస్‌ డిపే మెరుపు గోల్‌తో డచ్‌ జట్టును 1-0 ముందంజలో నిలిపాడు. ప్రథమార్థం ఇంజూరీ టైమ్‌లో డేలీ బ్లైండ్‌ తొలి గోల్‌ సన్నివేశాన్ని పునరావృతం చేశాడు. దీంతో ప్రథమార్థాన్ని 2-0 ఆధిక్యంతో ముగించింది నెదర్లాండ్స్‌. 76వ నిమిషంలో హాజీ రైట్‌ గోల్‌తో అమెరికా ఖాతా తెరిచినా.. 81వ నిమిషంలో డెంజల్‌ డంఫ్రైస్‌ మరో గోల్‌తో నెదర్లాండ్స్‌ ఆధిక్యాన్ని 3-1కు తీసుకెళ్లాడు. ఈ గోల్‌తో అమెరికా కథ ముగిసింది. అర్జెంటీనా, ఆస్ట్రేలియా మ్యాచ్‌ విజేతతో క్వార్టర్‌ఫైనల్లో డచ్‌ జట్టు తలపడనుంది.