గ్వాంఝు(చైనా): బిడబ్ల్యుఎఫ్‌ ప్రపంచ టూర్‌ ఫైనల్లో తొలి మ్యాచ్‌లో భారత షట్లర్‌ హెచ్‌ఎస్‌ ప్రణయ్‌ రాయ్‌ ఓటమి పాలయ్యాడు. బుధవారం జరిగిన గ్రూప్‌-ఏ తొలిరౌండ్‌ పోటీలో 12వ సీడ్‌ ప్రణయ్‌ 12-21, 21-9, 17-21తో జపాన్‌కు చెందిన నరోకా చేతిలో పోరాడి ఓడాడు. తొలి గేమ్‌ను ఓడిన ప్రణయ్‌.. రెండో గేమ్‌లో అద్భుత ప్రదర్శనతో రాణించాడు. ఇక నిర్ణయాత్మక మూడో గేమ్‌లో ఇరువురు హోరాహోరీగా తలపడగా.. చివర్లో ఓటమిని చవిచూశాడు. ప్రణయ్‌ మూడు అనవసర తప్పిదాలతో చేజేతులా ఓడాడు. మూడో గేమ్‌లో 14-14 పాయింట్లతో.. ఆ తర్వాత 17-17పాయింట్లతో సమంగా నిలిచిన ప్రణయ్‌.. ఆ తర్వాత వరుసగా జపాన్‌ షట్లర్‌ నాలుగు పాయింట్లు చేజిక్కించుకొని మ్యాచ్‌ను ముగించాడు. గురువారం జరిగే రెండో మ్యాచ్‌లో ప్రణయ్‌.. చైనాకు చెందిన లూ జంగ్‌తో తలపడనున్నాడు. ఇతర పోటీల్లో విక్టర్‌ అక్సెల్సన్‌(డెన్మార్క్‌), కి-యు లో(చైనా), గింటింగ్‌(మలేషియా) తొలిరౌండ్‌ పోటీల్లో విజయం సాధించారు.