పోక్సో చట్టంపై విద్యార్థులకు అవగాహన కల్పించిన న్యాయ, పోలీసు అధికారులు

నవతెలంగాణ – నాచారం: బాలల భద్రత, హక్కుల పరిరక్షణపై విద్యార్థులకు అవగాహన కల్పించేందుకు మేడ్చల్–మల్కాజిగిరి జిల్లా న్యాయ సేవాధికార సంస్థ ఆధ్వర్యంలో మల్లాపూర్‌లోని జిల్లా పరిషత్ ఉన్నత పాఠశాల (జెడ్పీహెచ్‌ఎస్‌)లో ‘సురక్షిత్ బచ్‌పన్ అభియాన్’ కార్యక్రమాన్ని నిర్వహించారు. ఈ కార్యక్రమంలో కుషాయిగూడ కోర్టు మొదటి అదనపు జిల్లా, సెషన్స్ జడ్జి బి. తిరుపతి, డీఐ వరుణ్ కాంత్ రెడ్డి, ఎస్‌ఐ ఫ్రాన్సిస్ పాల్గొన్నారు.ఈ సందర్భంగా విద్యార్థులకు బాలలపై లైంగిక నేరాల నుంచి రక్షణ కల్పించే పోక్సో (పోక్సో) చట్టం–2012పై అవగాహన కల్పించారు.బాలలపై జరిగే లైంగిక వేధింపులు, నేరాల స్వరూపం, వాటిని ఎలా గుర్తించాలి, అలాంటి పరిస్థితులు ఎదురైనప్పుడు తమను తాము ఎలా రక్షించుకోవాలి అనే అంశాలను వివరించారు. అనుచిత ప్రవర్తన ఎదురైతే భయపడకుండా తల్లిదండ్రులు, ఉపాధ్యాయులు లేదా సంబంధిత అధికారులకు ఫిర్యాదు చేయాలని సూచించారు.బాలల హక్కులు, వ్యక్తిగత భద్రత, రక్షణకు సంబంధించిన అంశాలను వివరిస్తూ, పిల్లలకు సురక్షితమైన వాతావరణం కల్పించడం ప్రతి ఒక్కరి బాధ్యత అని పేర్కొన్నారు. విద్యార్థులు ఎలాంటి వేధింపులకూ భయపడకుండా ధైర్యంగా ముందుకు వచ్చి తమ సమస్యలను తెలియజేయాలని సూచించారు. బాలల రక్షణపై అవగాహన పెంపొందించడమే ఈ కార్యక్రమం ప్రధాన ఉద్దేశమని తెలిపారు.