మధ్యాహ్న భోజన పథకంలో సెంట్రలైజ్డ్ కిచెన్ విధానాన్ని రద్దు చేయాలని డిమాండ్ చేస్తూ రాష్ట్ర మధ్యాహ్న భోజన పథకం వర్కర్స్ యూనియన్ పిలుపు మేరకు వంట కార్మికులు స్థానిక ఎమ్మెల్యే క్యాంపు కార్యాలయం ఎదుట బుధవారం ధర్నా నిర్వహించారు. ఈ

నిరసన అనంతరం సమస్యలతో కూడిన వినతిపత్రాన్ని క్యాంపు కార్యాలయ సిబ్బందికి అందజేశారు. ఈ సందర్భంగా ఏఐటీయూసీ జిల్లా గౌరవాధ్యక్షులు నిమ్మటూరి రామకృష్ణ మాట్లాడుతూ... కార్మికులు 23 ఏళ్లుగా ఎన్నో కష్టాలకోర్చి విద్యార్థులకు వంట చేసి పెడుతున్నారన్నారు.

ఇప్పుడు ప్రభుత్వం రాష్ట్రవ్యాప్తంగా సెంట్రలైజ్డ్ కిచెన్ విధానం తెచ్చేందుకు సిద్ధపడటం దారుణమన్నారు. ప్రభుత్వ విద్యాసంస్థల్లో అమలు చేయాలనుకుంటున్న ఈ నిర్ణయాన్ని తక్షణమే ఉపసంహరించుకోవాలన్నారు. పెరిగిన నిత్యావసర ధరలకు అనుగుణంగా భోజన మెనూ ఛార్జీలను వెంటనే పెంచాలని కోరారు. మధ్యాహ్న భోజన వంట కార్మికులకు నెలకు రూ. 26 వేలు కనీస వేతనం చెల్లించాలని డిమాండ్ చేశారు. పాఠశాలల్లో భోజన తయారీకి కావలసిన వంటగ్యాస్‌ను ప్రభుత్వమే సరఫరా చేయాలన్నారు. వంట కార్మికులందరికీ ప్రభుత్వం వెంటనే అధికారిక గుర్తింపు కార్డులు అందజేయాలని కోరారు. కార్మికులకు ప్రమాద బీమాతో పాటు ఈఎస్‌ఐ, పీఎఫ్ సౌకర్యాలు కల్పించాలన్నారు.

సుదీర్ఘకాలంగా పెండింగ్ లో ఉన్న బిల్లులు, మెనూ ఛార్జీలు, కోడిగుడ్ల బిల్లులను వెంటనే చెల్లించి కార్మికులను ఆదుకోవాలన్నారు.

బహిరంగ మార్కెట్ రేట్లకు అనుగుణంగా కోడిగుడ్ల ఛార్జీలను కూడా పెంచాలని విజ్ఞప్తి చేశారు. ఈ కార్యక్రమంలో ఏఐటీయూసీ జిల్లా
ఉపాధ్యక్షురాలు గుదే రాజ్యలక్ష్మి, మండల ప్రధాన కార్యదర్శి మహాదేవ లక్ష్మి, నాయకులు పి. సీత, జరీనా, శ్రీలక్ష్మి, జీవ, మాణిక్యం, నాగలక్ష్మి, సుజాత, నాగమ్మ, సక్కుబాయి, చంటమ్మ పాల్గొన్నారు.