‌పతక జోరు

ఆదివారం ఏడు మెడల్స్‌ కైవసం
అథ్లెటిక్స్‌‌లో ఐదు, స్క్వాస్‌లో రెండు సొంతం
2026 ఆసియా క్రీడలు
నగోయా (జపాన్‌)
ఆసియా క్రీడల్లో టీమ్‌ ఇండియా పతక జోరు కొనసాగుతుంది. అథ్లెటిక్స్‌‌లో పతక వర్షం షూరూ కాగా.. ఆదివారం ఒక్కరోజే భారత్‌ ఏడు పతకాలు సొంతం చేసుకోగా, బాక్సింగ్‌‌లో మరో మూడు మెడల్స్‌ ‌ఖాయం చేసుకుంది. అథ్లెటిక్స్‌‌లో రెండు, స్క్వాష్‌‌లో నాలుగు సిల్వర్‌ ‌మెడల్స్‌ ‌రాగా.. అథ్లెటిక్స్‌‌లో మరో మూడు కాంస్య పతకాలు దక్కాయి. ఆసియా క్రీడల్లో ఎనిమిది రోజు ముగిసేనాటికి భారత్‌ 4 ‌స్వర్ణాలు, 16 రతజాలు, 17 కాంస్య పతకాలతో మొత్తం 37 మెడల్స్‌ ‌సాధించింది పాయింట్ల పట్టికలో 12వ స్థానంలో కొనసాగుతోంది. చైనా 119 పసిడి పతకాలు, 48 సిల్వర్‌ ‌మెడల్స్‌, 38 కాంస్య పతకాలు సహా 205 మెడల్స్‌‌తో అగ్రస్థానంలో కొనసాగుతోంది. ​
స్క్వాష్‌‌లో రెండు రజతాలు
స్క్వాష్‌‌లో పసిడి పతకాలపై కన్నేసిన అభయ్‌ ‌సింగ్‌, అనహత్‌ ‌సింగ్‌‌లు సిల్వర్‌ ‌మెడల్స్‌‌తో సరిపెట్టుకున్నారు. పురుషుల సింగిల్స్‌ ‌ఫైనల్లో అభయ్‌ ‌సింగ్‌ 0-3‌తో ఓటమి పాలయ్యాడు. 9-11, 5-11, 5-11తో డిఫెండింగ్‌ ‌చాంపియన్‌ ఎయాన్‌ (‌మలేషియా)కు పసిడి కోల్పోయాడు. సౌరవ్‌ ‌ఘోషల్‌ ‌తర్వాత ఆసియా క్రీడల్లో సిల్వర్‌ ‌మెడల్‌ ‌సాధించిన భారత్‌ క్రీడాకారుడిగా అభయ్‌ ‌సింగ్‌ ‌నిలిచాడు. మహిళల సింగిల్స్‌ ‌ఫైనల్లో అనహత్‌ ‌సింగ్‌ ‌సైతం ఓటమి చెందింది. మలేషియా అమ్మాయి శివసంగారి 3-0తో అనహత్‌‌పై గెలుపొందింది. 4-11, 4-11, 7-11తో వరల్డ్‌‌ నం.5 చేతిలో అనహత్‌ ‌సింగ్‌ ‌పరాజయం పాలైంది. ఆసియా క్రీడల్లో సిల్వర్‌ ‌మెడల్‌ ‌సాధించిన తొలి భారత స్క్వాష్‌ ‌ప్లేయర్‌‌గా అనహత్‌ ‌సింగ్‌ ‌నిలిచింది.
​అథ్లెటిక్స్‌‌లో దూకుడు
అథ్లెటిక్స్‌‌లో పతకాల వెల్లువ కొనసాగుతోంది. మహిళల లాంగ్‌‌జంప్‌‌లో ఆన్సీ సోజన్‌ ‌తృటిలో పసిడి చేజార్చుకుంది. ఫైనల్లో రికార్డు 6.53 మీటర్ల జంప్‌‌తో ఆన్సీ సిల్వర్‌ ‌మెడల్‌ ‌దక్కించుకోగా.. చైనా అథ్లెట్‌ 6.55 మీటర్ల జంప్‌‌తో పసిడి పతకం ఎగరేసుకుపోయింది. శాలిని సింగ్‌ 6.42మీటర్ల జంప్‌‌తో నాల్గో స్థానంలో నిలిచి కాంస్య పతకానికి అడుగు దూరంలో ఆగిపోయింది. పురుషుల హై జంప్‌‌లో సర్వేశ్‌ ‌కుమార్‌ ‌రజత ప్రదర్శన కనబరిచాడు. 2.25 మీటర్ల జంప్‌‌తో సర్వేశ్‌ ‌మెడల్‌ ‌సొంతం చేసుకున్నాడు. చైనీస్‌ ‌తైపీ, దక్షిణ కొరియా అథ్లెట్లు పసిడి, కాంస్య పతకాలు సాధించారు. మహిళల 3000మీటర్ల స్టీపుల్‌‌చేజ్‌‌లో పారుల్‌ ‌చౌదరి పతకం సాధించింది. 9.08.67 సెకండ్లలో రేసును ముగించిన పారుల్‌.. కాంస్య పతకం దక్కించుకుంది. బహ్రెయిన్‌, కజకిస్తాన్‌ ‌స్పింటర్లు పసిడి, కాంస్యం సాధించారు. పురుషుల డెకథ్లాన్‌‌లో తేజస్విని శంకర్‌ ‌కాంస్య పతకం సాధించాడు. 2022లో సిల్వర్‌ ‌సాధించిన తేజస్విని శంకర్‌ ‌నగోయాలో కాంస్యంతో సరిపెట్టుకున్నాడు. మహిళల 200 మీటర్ల ఫైనల్లో హరిత భద్ర 23.20 సెకండ్లలో రేసును ముగించి మూడో స్థానంలో నిలిచింది. కాంస్య పతకం కైవసం చేసుకుంది. ఇదిలా ఉండగా, బాక్సింగ్‌‌లో అంకుశ్‌ (‌మెన్స్‌ 80 కేజీలు), పర్వీన్‌ (‌మహిళల 65 కేజీలు), నరేందర్‌ (‌మెన్స్‌ 90+ కేజీలు) క్వార్టర్‌‌ఫైనల్‌‌కు చేరుకుని పతకాలు ఖాయం చేశారు.