నవతెలంగాణ - హైదరాబాద్ : భారత్‌, న్యూజిలాండ్‌ జట్ల మధ్య ఐదు టీ20ల సిరీస్‌లో భాగంగా మూడో మ్యాచ్‌ నేడు (అక్టోబర్‌ 27) మధ్యాహ్నం 12.30 గంటలకు జరగనుంది. న్యూజిలాండ్‌లోని వెల్లింగ్టన్‌ వేదికగా ఈ మ్యాచ్‌ నిర్వహించనున్నారు. తొలి రెండు మ్యాచ్‌ల్లో విజయం సాధించిన భారత జట్టు 2-0 ఆధిక్యంలో ఉంది. నేటి మ్యాచ్‌లోనూ గెలిస్తే మరో రెండు మ్యాచ్‌లు మిగిలి ఉండగానే సిరీస్‌ను కైవసం చేసుకుంటుంది. అయితే, వెల్లింగ్టన్‌లో వాతావరణ పరిస్థితులు మ్యాచ్‌పై ప్రభావం చూపే అవకాశం ఉంది. వర్ష సూచన నేపథ్యంలో మ్యాచ్‌ నిర్వహణపై అభిమానుల్లో ఆసక్తి నెలకొంది. తాజా వాతావరణ అంచనాల ప్రకారం మ్యాచ్‌ సమయానికి వర్షం తగ్గే అవకాశాలున్నప్పటికీ, పరిస్థితుల్లో మార్పులు సంభవించవచ్చు. మరోవైపు, సిరీస్‌లో నిలవాలంటే న్యూజిలాండ్‌ జట్టుకు ఈ మ్యాచ్‌ కీలకం. స్వదేశంలో జరుగుతున్న పోరులో విజయం సాధించి సిరీస్‌ ఆశలను సజీవంగా ఉంచుకోవాలని కివీస్‌ పట్టుదలతో ఉంది. దీంతో మూడో టీ20లో ఇరు జట్ల మధ్య ఆసక్తికర పోరు జరిగే అవకాశం ఉంది.