భారత్, వెస్టిండీస్‌ నాల్గో టీ20 మ్యాచ్‌ నేడు
కొత్త పిచ్‌తో ముస్తాబైన భారీ స్కోర్ల ఉప్పల్‌ స్టేడియం
సిరీస్‌ విజయంపై కన్నేసిన శ్రేయస్‌సేన
రాత్రి 7 నుంచి స్టార్‌స్పోర్ట్స్‌లో ప్రసారం
భారత్, వెస్టిండీస్‌ టీ20 ధమాకా బ్యాటింగ్‌ స్వర్గధామం ఉప్పల్‌ స్టేడియానికి చేరుకుంది. నిలకడగా 250 ప్లస్‌ స్కోర్లకు వేదికగా నిలిచిన ఉప్పల్‌లో నేడు భారత్, వెస్టిండీస్‌ కీలక నాల్గో టీ20లో తాడోపేడో తేల్చుకోనున్నాయి. అభిషేక్‌ శర్మ, ఇషాన్‌ కిషన్‌, నితీశ్‌ కుమార్‌ రెడ్డిలకు ఇది ఐపీఎల్‌ సొంత మైదానం కాగా.. హైదరాబాదీ ఆటగాడు తిలక్‌ వర్మ తొలిసారి సొంత మైదానంలో జాతీయ జట్టుకు ఆడనున్నాడు. దీంతో ఓ వైపు రికార్డు స్కోర్ల అంచనాలు, మరోవైపు ధనాధన్‌ హిట్టర్లపై ఫోకస్‌తో పాటు లోకల్‌బాయ్‌ తిలక్‌ వర్మ కోసం అభిమానులు ఆసక్తిగా ఎదురుచూస్తున్నారు. సిరీస్‌ విజయాన్ని ఇక్కడే అందుకోవాలని టీమ్‌ ఇండియా భావిస్తుండగా.. చిన్నస్వామిలో డిసైడర్‌ ఆడేలా చేయాలని కరీబియన్లు సిద్ధమవుతున్నారు.
ఐదు మ్యాచ్‌ల టీ20 సిరీస్‌ రసవత్తర దశలో హైదరాబాద్‌కు చేరుకుంది. మూడు మ్యాచ్‌ల అనంతరం టీమ్‌ ఇండియా 2-1తో ముందంజలో నిలువగా.. సిరీస్‌ విజయమే లక్ష్యంగా భారత్ నేడు బరిలోకి దిగుతోంది. రాంచిలో 250 పరుగుల లక్ష్యాన్ని ఊదేసిన వెస్టిండీస్‌ నేడు బ్యాటింగ్‌కు అనుకూలించే ఉప్పల్‌ స్టేడియంలో సిరీస్‌ సమం చేయాలని భావిస్తోంది. ఇరు జట్ల బ్యాటింగ్‌తో పాటు బౌలింగ్‌ ప్రణాళికలు సైతం కొన్ని మార్పులకు లోనయ్యే అవకాశాలు కనిపిస్తుండగా.. భారత్, వెస్టిండీస్‌ నాల్గో టీ20 నేడు ఉప్పల్‌ స్టేడియంలో జరుగనుంది.
తిలక్‌ వర్మపైనే ఫోకస్‌!
లోకల్‌ బాయ్‌ తిలక్‌ వర్మ తొలిసారి వైస్‌ కెప్టెన్‌గా సొంత మైదానంలో బరిలోకి దిగనున్నాడు. భారత టీ20 జట్టులో రెగ్యులర్‌ ప్లేయర్‌గా స్థానం సుస్థిరం చేసుకున్న తిలక్‌ వర్మ.. చివరగా ఉప్పల్‌ స్టేడియంలో టీజీ20 మ్యాచ్‌లో భారీ సెంచరీతో మెప్పించాడు. మిడిల్‌ ఆర్డర్‌లో ధనాధన్‌ ఇన్నింగ్స్‌లతో మెరుస్తున్న తిలక్‌ వర్మ నేడు బ్యాటింగ్‌ ఆర్డర్‌లో ముందుకొచ్చే అవకాశాలు లేకపోలేదు. తిలక్‌ వర్మతో పాటు ఐపీఎల్‌లో హైదరాబాద్‌ బాయ్స్‌ అభిషేక్‌ శర్మ, ఇషాన్‌ కిషన్‌, నితీశ్‌ కుమార్‌ రెడ్డి త్రయం సైతం ఇక్కడ ధనాధన్‌ ప్రదర్శన కనబరిచేందుకు ఎదురుచూస్తున్నారు. బ్యాటింగ్‌కు అనుకూలించే పిచ్‌పై అభిషేక్‌ శర్మ, సంజు శాంసన్‌, ఇషాన్‌ కిషన్‌లలో ఎవరు నిలిచినా స్కోరు బోర్డు పరుగులు పెట్టడం ఖాయం. 2024లో ఇక్కడ జరిగిన టీ20లో బంగ్లాదేశ్‌పై సంజు శాంసన్‌ శతక మోత మోగించాడు. కెప్టెన్‌ శ్రేయస్ అయ్యర్‌కు సైతం ఇక్కడ మంచి రికార్డుంది. దీంతో భారత్ తొలుత బ్యాటింగ్‌ చేసినా, లక్ష్యాన్ని ఛేదించినా విధ్వంసక విన్యాసాలు లాంఛనమే. బౌలింగ్‌ విభాగంలో రాంచిలో నిరాశపరిచినా.. ఇండోర్‌లో పుంజుకుంది. స్పిన్నర్‌ కుల్‌దీప్‌ యాదవ్‌ స్థానంలో మయాంక్‌ యాదవ్‌ ఇక్కడా ఆడనున్నాడు. మిశ్రమ మట్టి పిచ్‌ నుంచి నిలకడగా వేగంగా బంతులేసే పేసర్లకు అనుకూలత ఉంటుంది. ప్రిన్స్‌ యాదవ్‌, మయాంక్‌ యాదవ్‌, ప్రిన్స్‌ యాదవ్‌లు ఈ అనుకూలతను సొమ్ము చేసుకునేందుకు చూస్తున్నారు. ఆల్‌రౌండర్లు నితీశ్‌ కుమార్‌ రెడ్డి, అక్షర్‌ పటేల్‌, నమన్‌ ధిర్‌లు మంచి ఫామ్‌లో ఉన్నారు.
పిచ్‌, వాతావరణం
టీమ్‌ ఇండియా టీ20ల్లో అత్యధిక స్కోరు (297) చేసిన స్టేడియం ఇదే. ఐపీఎల్‌లో విధ్వంసక జట్టు సన్‌రైజర్స్‌ సొంత మైదానం సైతం ఉప్పలే. దీంతో ఉప్పల్‌ పిచ్‌ బ్యాటింగ్‌ స్వర్గధామం అని ప్రత్యేకంగా చెప్పనవసరం లేదు. ఇటీవల కొత్త పిచ్‌ను తయారు చేసినా.. బ్యాటింగ్‌ అనుకూలతలో ఎటువంటి మార్పు ఉండే అవకాశం లేదు!. బుధవారం వాతావరణం అధిక ఉష్ణోగ్రతలు నమోదు కానుండగా, రాత్రి వేళ మంచు కురిసే అవకాశం లేకపోలేదు. అదే జరిగితే, బౌలర్ల కష్టాలు రెట్టింపు కావటం ఖాయం. మంచు ప్రభావం దృష్ట్యా టాస్‌ నెగ్గిన జట్టు రెండో ఇన్నింగ్స్‌లో బ్యాటింగ్‌కు మొగ్గుచూపవచ్చు. నేడు భారత్, వెస్టిండీస్‌ మ్యాచ్‌కు ఎర్ర, నల్ల మట్టి మిశ్రమంతో చేసిన పిచ్‌ను వాడనున్నారు.
తుది జట్లు (అంచనా)
భారత్ : అభిషేక్‌ శర్మ, సంజు శాంసన్‌ (వికెట్‌ కీపర్), ఇషాన్‌ కిషన్‌, శ్రేయస్ అయ్యర్‌ (కెప్టెన్‌), తిలక్‌ వర్మ, నమన్‌ ధిర్‌, నితీశ్‌ కుమార్‌ రెడ్డి, అక్షర్‌ పటేల్‌, ప్రిన్స్‌ యాదవ్‌, మయాంక్‌ యాదవ్‌, అర్ష్‌దీప్‌ సింగ్‌.
వెస్టిండీస్‌ : షయ్ హోప్‌ (కెప్టెన్‌, వికెట్‌ కీపర్), కామిల్ పూరన్‌, షిమ్రోన్ హెట్‌మయర్‌, రోవ్‌మాన్‌ పావెల్‌, షెర్ఫేన్‌ రూథర్‌ఫోర్డ్‌, రొమారియో షెఫర్డ్‌, రోస్టన్‌ ఛేజ్‌, షమర్‌ స్ర్పింజర్‌, కీమో పాల్‌, షమర్‌ జొసెఫ్‌, మోటీ.
సమంపై కరీబియన్ల గురి
పొట్టి ఫార్మాట్‌లో వెస్టిండీస్‌ బలమైన జట్టే. కానీ భారత్‌కు గట్టి పోటీ ఇవ్వలేకపోతుంది. కెప్టెన్‌ షయ్ హోప్‌ ఒంటరి పోరాటం చేస్తున్నాడు. బ్యాట్‌తో అతడు ఓ ఎండ్‌లో భారత బౌలర్లను ఎదురించే ప్రయత్నం చేస్తున్నాడు. సహచర బ్యాటర్ల నుంచి సహకారం లభిస్తే ఫలితం రాంచి తరహాలో ఉంటుంది. కానీ, ఇతర బ్యాటర్లు నిలకడగా రాణించటం లేదు. అయితే, బలమైన భారత్‌ను ఢీకొట్టేందుకు బ్యాట్‌తో మెరిస్తే సరిపోదు, బంతితో మాయ చేయాలని స్పిన్నర్‌ రోస్టన్‌ ఛేజ్‌ చూపించాడు. లెఫ్ట్‌ హ్యాండ్‌ బ్యాటర్లు అభిషేక్‌ శర్మ, ఇషాన్‌ కిషన్‌, శ్రేయస్ అయ్యర్‌లు ఛేజ్‌ను ఎదుర్కొనేందుకు ఇబ్బందులు పడుతున్నారు. హార్డ్‌ లెంగ్త్‌ బంతులేస్తున్న ఛేజ్‌.. యార్కర్లతో మ్యాజిక్‌ చేస్తున్నాడు. బంతితో ఛేజ్‌ రాణిస్తే విండీస్‌ విజయావకాశాలు గణనీయంగా మెరుగవుతాయి. విండీస్‌ శిబిరంలో ఇతర బౌలర్లు ఎవరూ భారత బ్యాటర్లను ఇబ్బంది పెట్టలేకపోతున్నారు. కామిల్ పూరన్‌, షిమ్రోన్ హెట్‌మయర్‌, రోవ్‌మాన్‌ పావెల్‌లు విండీస్‌కు కీలకం కానున్నారు. రాంచి టీ20లో గాయపడిన రూథర్‌ఫోర్డ్‌ ఇండోర్‌లో ఆడలేదు. నేడు అతడు ఫిట్‌నెస్‌ సాధిస్తే నేరుగా తుది జట్టులోకి రానున్నాడు.
కామెంట్‌లు (0)